ყველაფერი, რაზეც Google თქვენთვის მუშაობს

თქვენი Google ანგარიში დროის დაზოგვაში გეხმარებათ — მასში შენახული ინფორმაციის მეშვეობით შეგიძლიათ პაროლების, მისამართების და გადახდის დეტალების ავტომატურად შევსება.

თქვენს Google ანგარიშში შესვლის შემდეგ ყველა Google სერვისი, რომელსაც იყენებთ, დაიწყებს ურთიერთქმედებას, რომ მეტი ამოცანის შესრულებაში დაგეხმაროთ. მაგალითად, დადასტურებული ავიაბილეთების შესახებ Gmail-ში მიღებული ინფორმაცია ავტომატურად სინქრონიზდება თქვენს Google Calendar-თან და Google Maps-თან, რომ აეროპორტში დროულად მიხვიდეთ.

YouTube ვიდეოების ყურების სხვადასხვა მოწყობილობიდან გაგრძელების შესაძლებლობა თუ თქვენი კონტაქტებისა და რჩეული Play Store აპების მუდმივი ხელმისაწვდომობა ნიშნავს, რომ სისტემაში შესვლის შემდეგ Google-ში ყველა ფუნქციით დაუბრკოლებლად ისარგებლებთ. გარდა ამისა, თქვენი Google ანგარიშის მეშვეობით მარტივად, უსაფრთხოდ და სწრაფად შეგიძლიათ შეხვიდეთ მესამე მხარის აპებში, რომ თქვენ მიერ არჩეული პარამეტრებით Google-ის გარეთაც ისარგებლოთ.

თქვენს მონაცემებსა და პარამეტრებს ერთი დაწკაპუნება გაშორებთ. უბრალოდ, შეეხეთ თქვენს პროფილის სურათს და გადადით „თქვენი Google ანგარიშის მართვის“ ბმულზე. პროფილის სურათიდანვე მარტივად შეგიძლიათ სისტემაში შესვლა, სისტემიდან გამოსვლა ან ინკოგნიტო რეჟიმის ჩართვა.

როცა საქმე კონფიდენციალურობას ეხება, ერთი პირობა ყველას ვერ მოერგება. სწორედ ამიტომ, თითოეულ Google ანგარიშში ხელმისაწვდომია სხვადასხვა მარტივად გამოსაყენებელი მართვის საშუალება და ხელსაწყო, როგორიცაა, მაგალითად, კონფიდენციალურობის შემოწმება, რომლებიც კონფიდენციალურობის საჭირო პარამეტრების არჩევაში დაგეხმარებათ. გარდა ამისა, ჩართვა/გამორთვის მარტივი გადამრთველებით შეგიძლიათ გააკონტროლოთ, რომელი მონაცემები შეინახოს თქვენს ანგარიშში, ანდაც წაშალოთ თქვენი მონაცემები თარიღების, პროდუქტებისა და თემების მიხედვით.

თქვენი Google ანგარიში გთავაზობთ უსაფრთხო, ერთიან სივრცეს, რომელშიც შეგიძლიათ შეინახოთ თქვენი პერსონალური ინფორმაცია, მაგალითად, საკრედიტო ბარათების მონაცემები, პაროლები და კონტაქტები, შემდეგ კი გამოიყენოთ ის ინტერნეტში, როცა დაგჭირდებათ.

თქვენი Google ანგარიში ავტომატურად იცავს თქვენს პერსონალურ ინფორმაციას, პარალელურად კი მის კონფიდენციალურობასა და უსაფრთხოებას უზრუნველყოფს. თითოეულ ანგარიშს მოყვება ისეთი ძლიერი ფუნქციები, როგორიცაა, მაგალითად, სპამის ფილტრები — რომლებიც ბლოკავს სახიფათო ელფოსტის 99,9%-ს, სანამ ის თქვენამდე მოაღწევს — და პერსონალური შეტყობინებები უსაფრთხოებასთან დაკავშირებით, რომლებიც გაგაფრთხილებთ საეჭვო აქტივობისა თუ მავნე კოდის შემცველი ვებსაიტების შესახებ.

ეს მარტივი ხელსაწყო გთავაზობთ პერსონალურ რეკომენდაციებს ანგარიშის დაცვასთან დაკავშირებით.

თქვენს Google ანგარიშში ჩაშენებულია პაროლების მმართველი, რომელიც უსაფრთხოდ ინახავს თქვენს პაროლებს ერთ სივრცეში, რომელზე წვდომაც მხოლოდ თქვენ შეგიძლიათ.